انا اسفة , مش عايزة اتنيل -3

مش هاحكي انهرده عن رقم واحد , لأن موضوع رقم واحد ده استمر مدة طويلة حصلت خلالها شوية احداث كده ساعدت في تكوين رأيي في موضوع الجواز.

نبتدي بأن في الفترة دي بدأت اولاد و بنات خالاتي واخوالي في قصة الجواز . اصل امي اصغر اخواتها فبالتالي و انا في ثانوي كان قريبي خالصوا او بيخلصوا جمعة و دخلوا على المرحلة الي بعدها , الي هي كما قال الشعب المصري "بمناسبة الشهادة الكبيرة , عقبال الجواز"

.

واحدة من قرايبي كنت بحبها جدا جدا و انا صغيرة , حبت واحدة و اتخاطبوا , و بعد شوية الموضوع منفعش و سابوا بعض . بعدها بشوية بدأت تقابل عرسان . الصراحة معرفش ده بمزجها ولا اتفرض عليها زي ما اتفرض عليا , المهم انها بقيت عادي بتقابل عرسان و العيلة و عيلة العيلة كلهم بيتدخلوا في الموضوع ده. ماشي , ما علينا , المهم جالها عريس , للأسف من طرف أمي. و عجابها و قرروا يكملوا مع بعض . بغض النظر عن ان الراجل مكانش بينزيلي من زور , انا كنت شايفة ان هي لازم تهتم برأيي علشان انا بهتم برأيها و الموضوع بقى كبر في دماغي و بقى في حساسية في المعاملة و كده . المشكلة ان , من ساعة ما هي اتخطبت و قلبت تماما "مدام". مش عارفة هتفهموا قصدي ولا لأ . بس قريبتي حبيبتي اللي كانت تكاد تكون مثل اعلى بقيت مدام... يا نهار اسود يعني. طريقة لبسها اتغيرت , و وزنها بدا في زيادة ملحوظة , و كلامها بقى اسلوب تاني خالص . حتى اهتمامتها اتغيرت. بطلنا نتكلم على الاغاني و الافلام و الاماكن الظريفة و بقيت كل حكاياتها عن خطيبها و مشاكلها معاه و اهله و طباعهم المختلفة. و طبعا انا كنت قريبتها العيلة , فبدأت تستبدل صحبتي بقرايبنا الاكبر سنا و بأمي اللي كل الناس بتحبها و بترتاح في الكلام معاها . قريبتي هي و والدتها بقوا يجوا البيت كتير زيارات لأمي. بيتكلموا في كل المواضيع الخاصة بالجواز و الفرح و الجهاز و الفرش. و الذي منه و انا شأت ام ابيت موجودة معاهم , مهو ميصحش يبقى عندنا ناس و اقعد في اوضتي لوحدي. فاللي كان بيحصل انني كنت بسمع و مبتكلمش , و اتكونت في دماغي نقطة مهمة جدا ... من ساعة ما اي موضوع بيدخل في الاهالي و الفلوس , لازم يقلب نكد .. امه قالت و اخته عمالولها و معملوليش و بعدين نعيد و نزيد في نفس الشكوى لحد ما انا كنت بسأل... طول ما هو مزعلك اوي كده , و لزمته ايه من الاصل. كلهم يبصولي و يقولولي "اش فهمك انت؟" اسكت و خلاص. المهم اتجوزوا و عاشوا فيما يبدو في تبات و نبات و خلفوا بنات و سابت الشغل و تحققت النبوءة , مدام مدام يعني, لدرجة انني فقدت الاهتمام بحتى متابعة الاخبار و راحة قريبتي الاولى ضحية هذا الاختراع الاجتماعي المسمى بالجواز

و دخلنا في حوارات عرسان و معجبين كتير مع قرايب آخرين. و ناس اتجوزوا و ناس فضلوا قاعدين كل دي حكايات مسلية نحكي عليها بعدين