انا اسفة , مش عايزة اتنيل -6

حصل ايه بقى بعد رقم 1؟ حصل زي ما بيحصل لبنات كتير في الجامعة , انفتاح على العالم الخارجي. تبدأ الواحدة تتفرج على الناس اللي حوليها و تكون رأيها و زوقها.

قبل ما ادخل في قبلت مين و ازاي لازم اقولوكوا كام حاجة مهمة. اولها اني بعد سنة اولى في حاسبات القاهرة , جاللي اكتئاب من احتكاكي بالمواصلات و الناس و كان نفسي احول جامعة امريكية زي اصحابي كلهم , ساعتها اهلي قالوا مافيش امكانيات مادية , بس ينفع نحوليك عين شمس, اقرب للبيت و حتى لو الجامعة مش حلوة, على الاقل مش هنضيع 3 ساعات او اكتر كل يوم في المواصلات . قلت ماشي , و ماله؟ و حويلت عين شمس, الحقيقة , كانت غلطة , عين شمس كانت اكثر بئس و شقاء من القاهرة, كانت اصعب في الدراسة , و اكثر في عدد المواد في الترم الواحد و جالي صدمة حضارية من كتر ما كنت مختلفة عن الناس, لا هم حابوني و لا انا حبيتهم.. ماكنش عاندي اصحب (غير 2-3 بالكتير) و قررت انني هابطل اروح الجامعة و هاذاكر في البيت الا المحاضرات اللي فيها حضور و غياب. و قضيت ال 3 سنين بتوع الجامعة كدة, اصحابي هم هم الناس بتوع المدرسة , و بعض الصداقات من التدريب الصيفي اللي عملته صيفين وراء بعض في نفس الشركة.

ثاني تغيير مهم انني في نص سنة ثالثة اتحجبت رغم ان اهلي كانوا معارضين مبدئيا و طبعا نظرة الناس ليا اتغيرت سواء سلبي او ايجابي

ثالثا و دي قلتها في وسط الكلام, انا كنت واخدة الموضوع جد اوي و كنت كل صيف اعمل 3 اشهر تدريب صيفي في شركة كبير, من اول سنة اولى. مش بس كده , ده كمان عشان متكنش عندي حياة اجتماعية و لا نشاطات في الجامعة, روحت اخذت 3 كورسات اسباني (و يا ريتني كنت كمملت للأخر) و كنت باشترك في نشاطات الجامعة الامريكية بعد لما كريم (اخويا الصغير) دخل سنة اول

رابعا , اعتراضا على مستوى التعليم في مصر, قررت في سنة 3 انني ادور علي فرصة ادرس فيها بره مصر , و خاصة اثناء مشروع التخرج في رابعة لما المشرف على المشروع و هو معاه دكتوراه في الكمبيوتر جرافكس قالي", انا مش فاهم مشروعكم, انا معانديش تخيل" اللي هو يا نهار ابوكم اسود دكتور جرافيكس معاندوش تخيل! لازم الواحد يتعلم على نظافة من الاول

خامسا و هاكتفي بهذا القدر انهرده , ان قصص العرسان بتاعت بنات و ولاد خلاتي و خيلاني بقيت موضوع العصر. كل قاعدة عائلية يكون فيها يا عريس يا عروسة بنسب و نلعن في اهلهم و دي طبعا صورة مشجعة جدا عن الجواز و سنينه