انا اسفة , مش عايزة اتنيل -8

يتبقى في ال 3 سنين بتوع الانفتاح كام 3 حكايات و بعدين نخش على الدروس المستفادة . اول حكاية , مش طويلة اوي, موضوع زميل شغل 1. زميل شغل واحد ده كان هو المسؤول عن التدريب الصيفي بتاعي في صيف سنة تانية. كان واد عبقري, ساعتها كان عنده مسلا 24 سنة , مخلص ماجيستير , و جيش , بقى له كذا سنة بيشتغل و شغال في الدكتوراه كمان. واد عارف ينظم وقته و جايب من الاخر . انا الصراحة كنت مبهورة به , بس انبهار اللي هو احترام و تقدير مش اعجاب و سحللة. الصراحة انا مش فاكرة بضبط ازاي و امتى اخدت بالي ان شاكله معجب بي , بس والله اعلم , كان الواد اتعلق و اللي حصل حصل. ليه انا بحكي عليه رغم ان مكانش في مشاعر من نحيتي؟ (رغم ان ده مش اول ولا اخر واحد يعني... احم احم.. لازم ارسم عليكوا الدور برده) علشان مع زميل شغل واحد اكتشفت ان ساعات و الواحدة مش داريانة , بترسل اشارات غلط! تفتح الباب و هي مش واخدة بالها و رغم ان القصة كلها مطولتش اوي الا انني حسيت اني بني ادمة واطية و استاهل درب الجزم انني مكانش واضحة في مشاعري من الاول. و من ساعتها اتعلمت اخد بالي كويس اوي اوي علشان موجعش حد بعد كده , حرام اللي بيتعمل فينا نطلعه على اولاد الناس

في نفس ذات الوقت اتعرفت على بطل الكورة. ده بقى كان موضوع طويل و معقد. احكيلكوا عليه الاول, اتعرفت عليه عن طريق زميلة في الشغل في صيف تانية برده , كان بطل كوره لما كان في الجامعة و الكل بيحلف به. بيشتغل بقى له شوية بره في مجال الكمبيوتر و بيعمل ماجيستير في نفس الوقت. لقينا معارف كتير مشتركوة و ابتدينا اصحاب و بعدين لقينا نفسنا بنرغي بالساعات في التليفون باليل و من غير ما حد فينا يقول حاجة بصراحة كان واضح ان احنا الاتنين بنعمل حساباتنا و بنقيم الوضع . ساعتها حتى كنت رجعت لتدريب السلة و كان بيجي يتفرج عليا (و اميد مش محتاجة اقوالوكم الوضع ده بيوتر اد ليه) و كنا بنتمشى احيانا مهع بعض في النادي. و مرة او مرتين خرجنا مع بعض. طب فين المشكلة؟ المشكلة ان مكانش فيه كيمياء خالص من ناحيتي و اعتقد هو كان واخد باله و بيديلي فرصة . كان له وجهة نظر امن لو واحدة و واحدة اصحاب و مندمجين مافيش سبب انهم ميعرفوش يكونوا اكتر من كده. كنت بحاول اقنع نفسي بالنظرية دي بس مامشيتش معايا. الواحد يعترف برده , الواد ده انا غالبا جننته, كنت باختفي بالشهر منغير حتى تليفون و بعدين يوحشني شوية , اكلمه تاني.برده بني ادمة واطية و عايزعة الحرق , انا عارفة. قاعدنا كده مدة و بعدين انا في ثتالثة جامعة اتحجبت. اعتقد بانسبة له, هي دي القشة الي قسمت ظهر البعير. قالي نفسي اشوف شكلك بعد الحجاب, اتقبلنا و بدأت التريئة "يا بنتي انا ليسه شايفك بالشورت من كام شهر, حجاب ايه و بتاع ايه" و دي كانت اول مره في حياتي اشوف حد بيهاجمني علشان الحجاب (كان في ناس بتعترض بس محدش بيهاجم) شوية اتضايقت بس عادي, اول كل حاجة بتوجع. المهم ماحدش فبينا حاول يكلم التاني بعدها بس اول لما خلصت الجامعة ة اشتغلت اتقبلنا تاني, غالبا احنا الاتنين كنا كبرنا و عقلنا و عرفنا نسامح بعض. انا سامحته على قلة الذوق و هو سامحني على عدم تحديد موقفي و اني جننته معايا. برده متكلمناش في الوموضوع بصراحة , بس مان واضح ان احنا مش لبعض, عرفنا نكون اصحاب بعد كده. بس للأسف اخبارنا انقطعت لما انا سافرت لندن, و لكن معجزة القرن , الفيس بوك, طمنيتنا على بعض تاني

المرة الجاية , احكيلكم على اول عريس,ولا الدروس المستفادة؟ هانشوف.