انا اسفة , مش عايزة اتنيل -4

وحشتكوا؟ مش أوي , صح؟ انا قلت كده برده . بس على الاقل وحشتكم القصة, مش هاطول عليكوا و هادخل في القصة على طول. النهارده قصة رقم 1

لازم ابتدي بأنني أحكيلكوا شوية على الظروف و الاوضاع وقتها اللي خلت بقى في رقم 1 اصلا. مدرستي كان ليها فرعين , فرع لحد اعدادي بس , و فرع تاني في كل السنين ثانوي و شهادة انجليزي و كلام كبير . دفعتي في المدرسة معضمهم نقلوا الفرع الكبير , بس في ناس راحوا مدارس تانية. و الدفعة نفسها اتقسمت اتنين, نص ثانوي عام و نص ثانوي انجليزي فا فالأخر فضل فينا يجي ثلاثين اربعين نفر اتفرقنا على الفصول معظم اصحابي بالصدفة كانوا في فصل واحد , اللي هو بالصدفة برده فصل رقم 1, اللي هو بالصدفة برده كان ابن صاحبة امي من الشغل. و طبعا بحكم المدرسة الكبيرة , و بحكم الصدمة الحضارية, نشأت عندي عادة سيئة و هي عادة الوسطة , تقولولي, يا ياسمين , ايه علاقة الوسطة بأي حاجة دلوقتي؟ اقولوكم, لأ في علاقة , أنا علشان ابتدي صداقة كنت احتاج ان الصديق او الصديقة الجداد يكونوا اصدقاء لحد قديم. مبعرفش ابتدي انا العلاقات للأسف . و بنفس الصدفة اللي بنتكلم عليها من الصبح , رقم واحد كتن اجتماعي جدا و صاحب الناس كلها

مش فاكرة بدأنا نتكلم في ايه و بقينا اصحاب ازاي, بس في خلال شهر او اتنين من بداية الدراسة بقينا كل يوم مع بعض. الفترة دي كانت فترة مراهقة , اكيد انتوا عارفين المراهقين كل واحد بيحب على روحه اصلا . معظم صحباتي "صاحبوا" يعني ارتبطوا و كان في عامل الوحدة , و عامل الفضول و حب التجرة و عامل الممنوع مرغوب و الاعتراض على المجتمع و عامل المراهقة , اللي زي ما قلنا فيها الواحد بيحب الحب نفسه و بعد وقت قليل قوي قلتلوا انا عندي مشاعر نحيتك , قال و أنا كمان , اتوكلنا على الله و اتصاحبنا احنا كمان

ايوه, انا اللي فتحت الموضوع , بجحة من يومي, و العملة السودة دي هاتتكرر كتير فممكن من دلوقتي تتعملوا معاها عادى

قبل ما احكي عن رقم واحد شخصيا, برده لازم اقول يعني ايه متصحبين في عرفنا (انا و اصحابي) في الفترة دي. اولا المتصحبين دول دائما بينظر لهم كزوج , فا مينفعش واحدة تبوصيلوا ولا واحد يبصيلها . اقصى نشاطاتهم كزوج ان هما يتمشوا مع بعض في المدرسة و بالكتير اوي في النادي. طبعا مكالمات التليفون طول النهار و ممكن هدايا فالنتين . موضوع الخروج مع بعض بقى ده مدارس, في ناس قالوا براحتهم , ماهم متصحبين , اممال حيكون زييوا زي الولاد التانية؟و دي المدرسة المتحررة المتفتحة, في مدارس اكثر محافظة قالوا لأ عيب, لو احنا عارفين ان همما بيخرجوا مع بعض لوحدهم اممال بيعملوا ايه تاني احنا منعرفهوش و حتى لو في مجموعة , الناس تقول علينا ايه. انا كنت من المدرسة الوسطية , ممكن خروج مع بعض في مجموعة او على الاقل وجود محرم. و طبعا بما ان كلنا في الهوا سوا , ما اسهل ان الواحدة تلاقي صديقة تخرج معاها و انا اخرج معاهم المرة اللي بعدها

كرة نحكي تاني