انا اسفة , مش عايزة اتنيل -2

ايه بقى حكاية زميل مدرسة رقم 1؟

ولا اي حاجة .. كان زميل في نفس السنة الدراسية بس في فصل تاني, اشتركنا مع بعض في اكثر من نشاط مدرسي فبقينا اصحاب (مش اوي برده الحق يتقال يعني), بس الواد كان شاطر و ذكي وطويل و حليوة و غير الانشطة , لقيت في حجات كتير ملفتة. و كنت تعبت من الضفضع اللي عمالة ابوس فيه مبيتحولش امير

زميل مدرسة رقم واحد مكانش عارف او كان عارف و بيستهبل , بس مش فارقة , كده كده سواء انا او هو كننا من المؤدبين اللي مش بيصاحبوا. ملحوظة , غير ان ده طبعا كلام مسخرة و ان حال الدنيا اتشقلب بعد كده, منتهى الانحراف ساعتها كان البنت اللي بتصاحب , و اكيد انا ماكنتش كده ... ده انا حتى مكنتش بكلام اولاد في التليفون...امال حب ايه و بتاع ايه .. اعتقد ساعتها كان حب افلاطوني او زي ما واحد بنت حلال قالت "حب من بعيد لبعيد", كنت بكون في قمة السعادة لما بنقضي وقت طويل مع بعض في نشاط او حفل مدرسي او رحلة و اصعب حاجة كانت الاجازة لان فين و فين لما نتقابل صدفة في النادي. انا بقرا الكلام ده و وقعة على روحي من الضحك... اصله صراحة, على رأي كوكب الشرق : حب ايه اللي انت جاي تقول عليه...انت تعرف قبله هو الحب ايه

ياللا خير .. المهم روحي يا ايام و تعالي يا ايام و لقينا نفسنا فجأة في ثانوي , في فرع المدرسة الكبير, و بعد ما كننا اكبر ناس في مدرسيتنا و لينا شننة و رنة بقينا حبيت عيال حايالله في أولى ثانوي محدش يسمع عنهم اصلا. اتعرفت عل ناس كتير و بقى ليا اصحاب اكتر بكتير من الاول و بدأ يظهر في حياتنا "رقم 1". و ده رقم واحد منغير تعريف لأنه اول علاقة في حياتي

نكمل المرة الجاية

فتتكم بعافية