انا اسفة , مش عايزة اتنيل -5

نكمل موضوع رقم 1

رقم واحد ده, واحد ابن حلال , طيب اوي اوي اوي, و كان بيحبني اوي اوي اوي. ماكنش حلو خالص , بل بالعكس كان ممتلئ يميل للبدانة وعينه ديقة لا تكاد ترى من خدوده و النظارة. بس هارجع و اقول كان طيب و بيحبني. و زي ما قلت المرة اللي فاتت , كان اجتماعي جدا, و كان شاطر, بنتنافس مع بعض في المذاكرة و نشجع بعض و كده. انا مش فاكرة اوي بس اعتقد انه اكيد كان مسلي جدا , احنا قاعدنا مع بعض 4 سنين, و على الاقل كل يوم ساعة تليفون غير الفسحة في المدرسة و كده. هو اه انا رغاية بس المدة دي اكيد مكنتش برغي فيها لوحدي , فبالتالي, اكيد اكيد كان مسلي. انا فاكرة انه احيانا كان عنده حكايات مبهرة , كان جرئ جدا و ممكن يعمل اي نشاط , و انتوا عارفين انا جبانة عامة. و كان له اخ اكبر منه بشوية , ف رقم 1 كتن ملم بحاجات كتير انا عمري ما سمعت عنها. و كان بيسافر مع اهله كتير و شاف الدنيا , انتوا برده عارفيين موضوع السفر ده بياكل معايا اوي (ياكل هنا معناها يملئ دماغي , يجذبني .. الخ) ايه كمان. كان رومنسي جدا , لدرجة انني كنت مقتنعة انه فنان لسه ملأش الفن بتاعه. كان طموح ومصر على مبدأه, و أهه الحمد لله, وصل في حياته للنجاح اللي كان نفسه فيه .. الله يكرمه , هارجع و اقول ابن حلال

قعادنا مع بعض تقريبا اربع سنين , فالاول, الدنيا كانت بسيطة , معظم الوقت كنا سعداء. الخلافات معضمها كان محاولات كل واحد فينا يفرض رأيه على التاني, مين اللي كلمته هتمشي, عادي يعني. كان برده فيه مشاكل غيرة ... هو بيغيير عليا جدا و انا مبغيرش خالص فبالتالي كان عندي نظرية , اخبط دماغك في الحيط . انا قلتلكم , هو كان طيب اوي و انا مش طيبة خالص. موضوع الغيرة اخد يتضخم بشكل ملحوظ في 2 و 3 ثانوي. انا كنت علمي رياضة و كنا 5 بنات في فصل كله اولاد , كل الفصل كانوا اصحابي, و كان فيه مجموعة و منهم همما دول بقى الكل في الكل و طبعا دول اللي كانوا بيفوروا دمه, ازاي و ازاي يكون ليا اصحاب ولاد غيره, هو انا ناقصني حاجة؟ هل انا عمري طلبت منه حاجة و قال لأ؟ يا عم ملهاش علاقة , هما اصحابي و انت حببي, ملهمش علاقة ببعض. الموضوع تطور اكتر بعد كده

كل الناس كانت مقتنعة انني شخصيتي اقوى منه , فالموضوع ده و عليه موضوع الغيرة جعل رقم واحد يلجئ الى بعض الحيل الغير نزيهة ليفرض قوة شخصيته عليا. اولها انه كان بيحاول يقنعنني ان كل الناس معجبة بيا و بتوقع بيننا (ما كنتش بصدقوا في دي... انا اصل عندي الصداقة دي شئ كبير اوي, فا ازاي يغلط في اصحابي). الحيلة التانية نظرية الرعب و المؤمرة .. هاستخدم كلمته "كل الرجالة أوساخ, مش عايزين من البنت غير حاجة واحدة بس " طبعا محدش ممكن يقربلي طول ما هو معايا المشكلة بدأت تظهر اوي أول لما دخلت الجمعة , بقى عندي حالت رعب من الناس كلها..بجد بارانويا..ماكنتش عارفة اتعامل مع الناس لا في الجمعة ولا في المواصلات و لا في اي حاجة لحد ما اكتشفت ان رقم 1 هو السبب فا بدأت اتجاهله تماما.يبدأ هو في الغيرة و حب السيطرة , افقد انا الاهتمام و اضرب الطرشة فكمية الخناءات اصبحت مش جايبة هممها. انا اكتشفت انه خانقني و هو اكتشف انني مش ممكن هاكوون طوع امره زي زمان.

سافرت في الصيف ده فرنسا مع اهلي واتفرج على باريس بدون اي سابق انظار كبرت في دماغي الفكرة ... موضوع رقم 1 ده كفاية عليه كده. اول لما رجعت مصر قعدت مع اصحابي عرضت علليهم الفكرة , و رغم اني كنت متوقعة معارضة و اعتراضات, لقيت الكل يؤيد الفكرة , فاتكلت على الله و قلته بص يا ابن الحلال , احنا خلاص مبقيناش ننفع لبعض, انت من سكة و انا من سكة (و احب اقول ان دي المرة الوحيدة فيي حياتي اللي جرأت اخد فيها الخطوة دي) المهم, الموضوع اخد يروح و يجي كمان 3 او 4 اشهر و في الاخر كل واحد فعلا راح لحال سبيله. اتكلمنا مرة في التليفون اتخانقننا على مين قال ايه و مين مقالش ايه في 3 جامعة و ماتكلمناش مع بعض لما لا يقل عن 10 سنين و بعدين من يجي سنة, اتكعبلنا في بعض على الفيس بوك و اتكلمنا سريعا و الحمد لله احب اطمنكم, رقم واحد ما شاء الله حاله 100 100, ناجح في حياته المهنية و العائلية و ربنا يوفقه...ادعوله

سلام انا بقى و نكمل بعدين .