تأملات في حياتي العاطفية

أول *سم وان سبيشيال* في حياتي كان في سنة أولى ثانوي. زميلي في المدرسة وحبينا بعض وكنا مقتنعين ان احنا لما نكبر هنتجوز. وفي أولى جامعة، اتغيرنا لدرجة أننا مبقيناش عارفين نتفق على أي حاجة. سيبنا بعض، ورغم انه انسان محترم جدا الا انه كان رسمي اوي.. بالورقة والقلم… بس الصراحة، كان بيحبني بجد. لما الموضوع انتهى دعيت ربنا ،قلت يا رب… المرة الجاية، عايزة حد مبدع وملحلح شوية، يا سلام لو فنان مثلا ويا سلام لو مش في مصر.

وقابلت تاني *سم وان سبيشيال* وانا في لندن بعمل الماجيستير: مصري، عايش طول عمره في انجلترا واسكتلنده، فنان ، بيشتغل في الفيديو والاعلانات والتصوير والاخراج.. حاجة مبهرة جدا. وكان شخصية مرحة وصحبته ممتعة… بس لما قرر يقلب عليا الوش التاني.. اخدت برضه وش فنان مهموم عنيف. انا كنت حبيته وانبهرت به اوي.. بس هو لأ. انتهت القصة ودعيت قلت يا رب… المرة الجاية، عايزة حد ذكي وحذق ومثقف ويكون بيحبني.. انا مش وش بهدلة.

وقابلت ثالث *سم وان سبيشيال* في الشركة اللي كنت بشتغل فيها ساعتها. كان زميلي في الكلية في سنة اولى وبعدين انا حولت لجامعة تانية. المهم، هو كان شخص مجتهد و ^*هارد وركر*^ و ذكي وطموح وحقيقي حبيني (على الاقل في الاول) . بس للأسف، إختلاف الوضوع الإقتصادي والإجتماعي بيننا كان سبب رئيسي في الإنفصال. دعيت وقلت يا رب.. المرة الجاية ابن ناس(مقصود بيها ناس زي اهلي يعني).. ومتكونش امه ولية حشارية يا رب.

وقررت انا وصديق ليا بقاله ١٠ سنين نرتبط ببعض. تصوروا، نعرف بعض من ١٠ سنين ، الواحد كان يعتقد ان ١٠ سنين دي مدة كافية انه يعرف حد. قالك لأ.. المعرفة العادية حاجة والعلاقات حاجة تانية خالص، المهم.. كان صديق وابن ناس وابوه وامه متوفيين.. جربنا نرتبط وبعد اقل من ٥ اشهر ، قررنا نسيب بعض. هو اه ابن ناس وكل حاجة، بس انا طموحي في الشغل و اهتماماتي في الحياة ودرجة ثقافتي كانت اعلى منه بكثير. دعيت وقلت يا رب.. المرة الجاية.. واحد ابن ناس ومثقف.. هي يعني صعبة؟ ربنا قادر على كل شئ.

وجاء بعد كده ال *سم وان سبيشيال* الكبير. اللي غير لي معنى الحب. ايوة.. قلت حب رغم ان انا بتفادى استخدام الكلمة دي. عرفت يعني ايه ان الحب لازم يكون من الناحيتين قد بعض.. مينفعش ابقى انا بموت على حد وهو مجرد بيستلطفني او العكس ونسميه حب. لازم يكون فيه اخذ وعطاء عشان يكون حب. الاستاذ ده كان جامد في كل حاجة… كل حاجة… كان مثقف وناجح وطموح وذكي وطيب وحنين وابن ناس ولطيف وزي القمر وكل اللي انتوا عايزينوا.. بس.. انا واحدة محجبة متدينة (نسبيا) وهو واحد من الاخر مالوش في موضوع الدين ده خالص.. فكرة الصلاة ماشي بس اكثر من كده كثير عليه.. صباح الخير كان فيها: طب متقلعي الحجاب.. اكيد بقى عندكوا الصورة كاملة. كان في الاول عندي اعتقاد ان ممكن كل واحد ينام على الجانب اللي يريحوا، بس بالوقت اثبتنا ان الموضوع ده مستحيل. وقررنا ننفصل واحنا لسه نذكر بعض بالخير قبل ما نكره بعض. في وسط الانهيار (مش هقدر اوصف الدنيا كانت قد ايه ظلمة ساعتها)، دعيت وقلت يا رب.. المرة الجاية المتدين.. مش مهم الحب.. عملنا بيه ايه الحب. الدين يأتي أولا و أخيرا

وقلت يالا ، بما اني مش بدور على الحب، نحاول نسمع كلام أهلي اللي بقالهم ١٠٠ سنة بيعرفوني على عرسان، اجبر خاطرهم واقابل واحد. على عكس العرسان اللي قابلتهم كلهم، انه لأول وهلة مكانش $ان ابسوليوت لووسر$. كان شكله من بعيد بني آدم طبيعي. جربت وقلت زي ما بيقولوا الحب بيجي بالعشرة وادينا بنعرف بعض وكده. كانت مأساة… غلطة عمري. رغم انه بني آدم طيب الا ان كانوا كام شهر سود مستنية حاجة تحصل ومبتحصلش.. في الحقيقة.. مش عارفة كنت مستنية ايه. بس الخلاصة. بالنسبة لي.. مكانش في مميزات تانية غير انه متدين.. دعيت وقلت يا رب.. بني آدم سوي يا رب.. يكون عارف ربنا (مش لازم متدين اوي)، وفي نفس الوقت حد ناجح ومبهر (انا بنبهر بالناجحين) وفي نفس الوقت مش حد بارد(انا برضه عايزة احب واتحب) وطلب اخير يا رب.. بجد، مش قادرة كلام في الفلوس.. يا رب.. خلي @موني از نوت ذا ايسو@. انا حالتي المادية لا تسمح ان حد يعد يعيط لي في الموضوع ده.

ظهر في حياتي - من حيث لا ادري ولم اكن احتسب - شخص ** ا ديفيرنت كايند اوف سبيشيال**. كان عندي أمل انه الوضع يتغير ويكون هو الشخص السبيشيال الوحيد. كان نفسي سبيشيال دي تتقلب حب. كان نفسي نشارك بعض في كل حاجة في حياتنا واحكي له ويحكي لي ونسافر نشوف العالم ونكسر الدنيا مع بعض. كان شخص عاقل وعبقري وناجح ولطيف وعارف ربنا وابن ناس ومحترم. كنت بقول طيب وحنون ويكاد يكون بني آدم سوي واعتقدت انه مهتم بي. طلع في عيب واحد بس.. زهق مني ومكانش عنده جرأة كافية يقولها لي في وشي.. فسبني على عمايا بحاول ارضيه. المهم.. القصة انتهت.. اللي هيا مكانتش قصة اصلا.. وقفت ودعيت وقلت يا رب.. المرة الجاية تكون اخر مرة.. تكون # ذا وان# ونكتفي بهذا القدر.

مفتاح الخريطة:

*someone special*

^* hard worker*^

$ An absolute loser $

@ Money is not the issue @

** A different kind of special **

#The One#


-- Late April / Early May 2013