انا اسفة , مش عايزة اتنيل -14

طبعا و في المرحلة دي, كانت في خطوبات و افراح لاصحاب بدأت تظهر في الافقو فكان عادي الجملة بتاعة "في واحد شافك في خطوبتي و عايز يتعرف عليكي"و عامة كان بيكون وراها مجموعة من القصص الوهمية كلها بتدور حول الواحد ده قد ايه جميل و عظيم و هايل و ازاي احنا ليقيين على بعض جدا. اول واحدة من النوع ده كانت في خطوبة صحبتي, و تاني او ثالث يوم كان عيد و سافرت مع اهلي شرم الشيخ و صحبتي كلمتني حكيتلي على الشاب العظيم اليي متفصل علشاني, و ان هي مش مصدقة ازاي مأخدتش بلها لغاية دلوقتي. الولد قعد يزن , اشوفها تاني, اشوفها تاني, تقوله مسافرة مع اهلها, كل يوم تكلمني تقولي بيقول هايسافر لك شرم الشيخ , قلت ايه يا غعم الهبل ده , انا خلاص جايا . و بعد اما رجعت القاهرة , اتوضبت خروجة مع اصحاب كتير و قعدت مع الولد. طول الساعتين اللي قعدناهم مع بعض بيتكلم عن الكورة, هو اه انا معنديش مشاكل مهع الكورة , بل بالعكس, انا بشجعها من بعيد لبعيد. بس الولد بقاله سنة و نص متخرج و لسه قمة اماله في الحياة انه يحترف كرة قدم , كده كتير عليا. فين الشغل و الطموح و الخطط بتاعة المستقبل و كده؟ و بعديتن طول السعتين جدزول مفكرش يسألني اي حاجة , شريط متواصل على موضوع الكورة, طبعا الموضوع انتهى على كده,و كان كفاية اوي منه كده فعلا

القصة دي اتكررت كذا مرة, مرة مع "دي جيه" اعتزل و قرر يتدين و يدور على واحدة محجبة بس كوول. الواد ده كانت عربيته جامدة قوي و كان ظريف بس برده مفيش كيمياء خالص. و بعد كده اعتقد كان في خريج سياسة و اقتصاد في التجنيد , برده مفيش كيمياء, و مش فاكرة اوي اذا كان في تاني ولا لأ

كان في قصة مسلية جدا برده . مرة كنت بتعشى مع العائلة الكريمة في كورتجيانو مصر الجديدة. و أحنا داخلين المطعم لقيت واحد متنح في خلقتي, اتخضيت لاصراحة بس كان هو مع عيلته و انا مع عيلتي في قلت مفيش قلق (ساعتها كان موضة التحرش الجنسي بدأت و الدنيا مبقيتش امان) المهم بعد عشر دقائق ربع ساعة دخلي ست شكلها عادي يعني مش قلق خالص و قعدت تلف حولين التربيزة بتاعتنا على الاقل 3 دقائق, و 3 دقائق على الساعة في صمت رهيب بيمروا براحة اوي, قلتلها, حضرتك بتدووري على حاجة؟ قالتي مش عارفة اقول ايه , ابتسمت و سكت, قالت: هو أنت متجوزة؟ سكت و بصيتلها بترقب و قلق. قالت انا كنت بدوور على الدبلة, و بعدين بلعت ريقها و قالت : اصل ابني شافك و هو داخل, والدي قاطعها و قالها, ايوة يا فندم , اي خدمة.؟ قالت اصل ابني فلان شاف الانسة... انسة صح؟ هزيينا دمغنا و قلنا نشوف الست المجنونة دي عايزة ايه ,قالت شاف الانسة و قالي يا ماما اخطوبيهالي! فأنا الصراحة مش عارفة اقول ايه. احنا طبعا اتثبتنا, ايه يا عام شغل الشبطان ده؟ هو عايل صغير عايز عسلية مثلا؟ و احنا الخمسة ساكتين محدش فتح بقه, طلعت الست جري و جابت الواد من ايده, يا عروسة بصي عليه.. انت مكسوفة و لا ايه؟ دا فلان ابني معجب و عايز يتقدملك! صمت رهيب. حتى والدي اتثبت! أمي ساعتها قالتلها, طب ينفع نتكلم في الموضوع ده بعدين؟ الست اخدت رقم تليفوننا و سحبت الواد المتنح و مشيوا. الحمد لله, أمي خلصيت الموضوع في التليفون