انا اسفة , مش عايزة اتنيل -13

 في حد ترك تعليق مستفز شوية على التدوينة اللي فاتت. , انا سايباها يعني ابقوا خدوا بصة عليها. بصراحة استفزتني اخر حاجة : من حق اي بني آدم يكون اي رأي طبعا, بس مش بفهم ان ازاي حد يدي نفسه الحق انه يقرر مصير حد تاني. التعليق بيقول انني مصيري اني اعيش وحيدة ... لاسؤال بقه, اش عرفك لا مؤخذة؟ اذا انا نفسي لسه معرفش. سعدتك كنت قعدت مع ربنا و اتكلمتوا في الموضوع ده و نسيتوا تقولولي؟ و لا انت ما شاء الله يعني عندك بصيرة ؟ و لا ذكائك خارق و ده استنتاجك الشخصي. اتفقعت شوية و قلت اطلعهم عليكوا في التدوينة دي, بس مش هاطول, ما انا كده كده كنت عاملة حسابي على بعض االاعتراضات
   
المرحلة اللي بعدها هي السنة بتاعة "اي بي ام" هي اه سنة واحدة بس بس ايه سنة عجب , مليانة قصص و حكايات, و انا بحاول افتكر في السرير قلت لنفسي.. يا نهار ابيض.. كل ده في سنة واحدة, رضت نفسي قالت, ما أنت اصلك مفترية يا ياسمين, قفلت الموضوع بسرعة و دخلت نمت

في حكايات طويلة و في قصيرة , خالبنا في القصيرين الاول. مبدائيا قصة زميل في الشغل, اتعرفت عليه السنة اللي قبلها اثناء التدريب الصيفي , كنت حاسة ان في مشاعر من ناحيته بس ماكنتش متأكدة, كان غريب شوية. لما اشتغلت بقى بعد التخرج الموضوع تأكد بس مبقيتش عارفة اعمل ايه و بدعي ربنا ان الموضوع يروح لوحده علشان محدش ييتجرح , ما انا مقروصة من قصة قبلها و لسه ضميري واجعني. بغض النظر عن ان من ناحيتي ما كنتش غفي مشاعر خالص, هو كمان كان عنده مشكلتين. اولا كان نكدي جدا جدا جدا, كل ما تيجي فرصة اننا نقعد مع بعض يقعد يعيد و يزيد في قد ايه هو زهقان و وحيد و قرفان من عيشته. كان من كتر الحكايات انا شخصيا بكره حياتي. تاني حاجة انه بعد ما قرر يتكلم معايا في الموضوع و اعتذرت له كبرت في دماغه فكرة انه انا بثقل عليه  و انه الحل علشان اعرف حقيقة مشاعري ناحيته انه يخليني اغير عليه. طبعا انا اول لما سمعت الحوار ده انهرت على روحي من الضحك و قلت حاجة شابه "يوه يا منيل, جدتك واكسة ضحكتني" بس قعد لمدة مش قليلة كل يوم يطلب مني اعرفه على واحدة من صحباتي (مش كصديق يعني, واحد عايز يضبط) و لو حصل انني قلت  لأ فلانة دي مرتبطة او ان علانة دي انت مش النوع اللي هي بتحبه, كان الرد بيكون, : شفتي! اديكي بتغيري أهو! و لا هو افتراء يعني, لا عايزاني و لا عايزاني اكون مع حد تاني. الموضوع اتنتهى لما هو جاء له مشروع في السعودية , مرجعش منه غير لما انا كنت سافرت لندن خلاص. و انقطعت الاخبار

في واحد تاني في الشغل لمح بوضوح انه عايز يتكلم معايا في "موضوع " و لما لمحت برضه بوضوح انني "في حد في دماغي" و مش هاقدر اتكلم في مواضيع, قرر ان همه الاول و الاخير انه يخنق عليا. مكررهاش كتير , بس مش هانساله ان حرق عليا مفاجأة كل اصحابي كانوا عاملينهالي بمناسبة حصولى على المنحة و استعدادي للسفر. لقيته في اول النهار بعت ايميل بيقول " انا اسف مش هقدر احضر الحفلة المفاجاة بتاعة توديعيك" اللي هو, متشكرة اوي.. ان شاء الله عنك ما حضرت, بس ليه تحرق المفاجأة اللي الناس تعبت اوي علشان تحضرها. طب انا غلسة و استاهل الخنق, هم ذنبهم ايه؟ وبرضه انقطعت اخباره لما سافرت

كان في فالشغل واحد قابلته في اول تدريب صيفي لي (اللي هو كان قابلها ب 4 سنين بس مش كتير يعني)و كان قعد يتتريق عليا علشان أنا صغيرة اوى! كان بيقول, يعني لما انا كنت بتعلم المش كان هو بيجري و يلعب كرة قدم , و لما كنت انا يا دوب بقول كلمتين, كان هو بيتكلم عربي و انجليزي و بيتعلم فرنساوي كمان, و غالبا اول لما انا دخلت المدرسة , كان هو ابتدئ يصاحب بنات. و انا طبعا لسه في صيف سنة اولىو كان الموضوع ده عاملي رهبة شديده و بقوله حضرتك و بتاع, اتقابلنا تاني في الشغل و بقينا زملاء في شركة مافيهاش القاب ,و اول حاجة قالهالي ايه؟ "والله كبرت و احلوتي يا ياسمين" قدام زملائي في الشغل و حاجة فضيحة. هذا الشخص الذوق جدا كان المفروض متجوز, بس هو كان فخور جدا بانه لعبي و بتاع ستات و مدوخ مراته. متفهموش ليه, رغم انه كان واحد كوول جدا الا اني لفت نظره , رغم اني محجبة. قعد اسبوعين ثلاثة يحاول معايا علشان اخرج معاه, بس في الاخر اكتشف اني دقة قديمة و دمي ثقيل و راح لحال سبيله . شفته بعدها بكذا سنة مع مراته التانية و بعدها بكذا سنة تانيين مع مراته الثالثة , بيتجوز و يطلق  بنفس السرعة اللي بيغيير فيها رخصة العربية. يالله بالشفاء.. مالناش دعوه

هاكتفي دلوقتي و اكمل بعدين
فتتكم بعافية