انا اسفة , مش عايزة اتنيل -10

والله اعلم , دي المجموعة دي اكتر حاجة كتبتها اتقرأت مطلقا. مش بس كده , لأ و ايه؟ بقى يجيلي تعليقات كمان , هنا على البلوج و كمان فيس بوك و ايميل و حتى بالتليفون. سؤال بقى , ليه التعليق على الفيس بوك مش هنا؟ انا مش معترضة والله, براحتكم, انا بس بحاول افهم. انا طبعا سعيدة بمشاركتكم, و كل مازهق و اقول كفاية الاقي حد بيقول عايز تاني او تعليق يشجعني فباكمل.

الحاجة التانية انني كمان عامالة افتكر كل شوية حاجة كنت ناسياها و صدقوني, مش بعمل كدة من باب الاثارة بتاعت المسلسلات, والله بلاقي نفسي بافتكر حاجات كنت تقريبا نسياها خالص, كأنني بعمل لنفسي تحليل و علاج نفسي, بدور جوايا على ليه انا بفكر كده, ففالاخر, المدونة دي علاج ليا مش تسلية ليكم.

من الحاجات المسلية اللي كنت ناسياها ان في مرة بابا رجع من العيادة في منتهى السعادة و الانشكاح بيقولي على واحد عريس جايله في العيادة. مش فاكرة كان في 3 ولا 4 جامعة بس كنت اتحجبت فاكيد مش 2. اللي حصل ان ام الراجل ده كانت بتروح لبابا كتير العيادة و في مرة شافت صورتي على مكتبه ( صورة قديمة مش بالحجاب حتى) فسئلته مين ديو قالها ياسمين بنتي الكبيرة قالتله بس لو كانت محجبة كنت جوزتها لابني فلان. بابا قال لأ ماهي دلوقتي محجبة بس مش بتفكر فالجواز خالص. الست مكدبتش خبر جابت تاني يوم ابنها يشوف الصورة و بالمرة بابا يشوفوا يعرف شكله ايه و قاعدت تحكيلوا عن امجاد الولد اللي انا طبعا مش فاكرة منها حاجة وعن امجاد العائلة و ان لو سمح بابا يعني يعرض عليا الموضوع و يقولها رأيي المرة الجاية (طبعا كلها ثقة انني مستحيل اتهف في عقلي و اقول لأ). بابا حكالي و طبعا قلته لأ. ايه يا حج الكلام الفارغ ده (ما الواحد اتقرص من عريس 1 من النوع اللي مش بنشوفوا قبلها) المهم لما راحوا لبابا في العيادة الست الحت و اصرت انها تكلمني في التليفون, بابا اتصل و قالي يا ياسمين يا حبيبتي معايا طنط فلانة مامت فلان عايزة تكلمك, قلتله مالوش لازمة يا بابا ما انا خلاص قلت لأ قالي ما معناه انه متدبس و مش عارف يخلع. الست اخدت السماعة و دخلت فيا شمال, يا حبيبتي و تحت امرك و طلباتك و احنا نطول نناسب الدكتور حازم و انا ابني اخلاقه ايه و ايه و بيقبض كذا و بيشتغل كذا و عندنا عمارة في مدينة نصر ليه فيها دور كامل و عندك الخدم و مش مطلوب منك اي حاجة , لو عايزة تكملي تعليم برحتك , ماجيستير , دكتوراه الي انت عايزاه و بعدين شبكتك موجودة 2 قيراط من جنوب افريقيا. كل الي عايزينوا منك انك تشوفيه. و بعد 10 دقائق من الكلام المتواصل اللي مكانش عندي فيهم فرصة حتى ارد عليها قالتلي: قلتي اي؟ انا كتمت الضحكة و قلتلها و الله يا طنط انا مش بفكر في الموضوع ده دلوقتي خالص, باعد اذن حاضرتك ممكن اكلم بابي. بابا اخد التليفون قلتله اتصرف فهو ضحك و قال نتكلم لما نروح. قالت بيني و بين نفسي معقولة كده؟ دي عائلة عانها كل حاجة جاهزة و العروسة بس بتمثل دور في مسرحية او كمالة عدد... مش فارقة هي مين و شخصيتها ايه.. هي واحدة تملى المكان الفاضي في الصورة و خلاص. بابا لما رجع قالي والله حاولت ازحلقها بس معرفتش و قعدنا نضحك للصبح انا و اهليو كان لسه موضوع الجواز ده مبقاش هوس و استحواذ على اهلي... ياه كان فيه يوم فعلا لسه بيعرفوا يضحكوا.... يااه زمان بقى