انا اسفة , مش عايزة اتنيل -9

و بما ان ماحدش قال نقول مين الاول, اول عريس ولا الدروس المستفادة, قررت اقول على اول عريس. اللي لسه فاكراه من كام يوم , ان عريس 2 برده كان في الجامعة . مهو الواحد مبيتعلمش بالساهل للأسف. المهم ان موضوعنا انهارده على عريس 1

تقريبا, كنت في 2 جامعة, لسه بنت حلوة و شقية بقى. كنت نازلة مشوار مع امي و قابلنا طنط فلانة صاحبتها. طنط فلانة دي متخصصة في موضوع العرايس و العرسان. اول لما شافتني حلفت للأمي بينهم و بين بعض تكون اول واحدة تجبلي عريس, ما انا كبيرت و احلويت . طنط كانت واخدة الموضوع كأنه سبق صحفي, هتاخد الجائزة بتاعة "اول عريس" و الحمد لله, اهي شربت الشرف العظيم ده

امي جاتلي مرة الاوضه و قالتلي عايزاكي في موضوع و قفلت الباب. كانت اول مرة و لسه مفهمتش البصة دي, انما ايه, دلوقتي من نبرة الصوت و البصة باعرف على طول ان الموضوع فيه عريس. ما علينا, قعدت مامي جنبي على السرير و قالتلي, طنط فلانة جايبالك عريس, قلتلها ليه يا مامي بس, انا لسه صغيرة, قالتي, طب اسمعي بس يمكن يعجبك, قلت ماشي, قالتلي, طويل و عريض, عنده 28 سنة, طبيب... اول لما قالت كده قلتلها مش عايزة دكاترة يا مامي ( كنت اولا متعقدة من رقم 1, و ثانيا عندي اقتناع تام بما ان عائلتي كلها من الناحتين دكاترة انهم فقر و ثالثا اني كنت منبهرة باسلوب حياة القطاع الخاص من 9 ل 5 مرة واحدة مش مستشفى الصبح و عيادة باليل) قالت اصبري بس.. مهو ابوه عنده مصنع مش فاكرة ايه , و هو بس بيشتغل في الجامعة بس معظم وقته مع شغل ابوه. ابن ناس اوي و مثقف و دمه خفيف (و كانت عندي نقطة مثقف دي مهمة لان اصحابي الولاد من المدرسة كانوا مبيينلي الانطباع ان الثقافة ماتت في الرجالة خلاص ... ده يا ربي مرة واحدة قال, طول ما انت بتدوري على واحد بيقرأ, هاتقعدي تدوري على طول) برده ما علينا, قلت لمامي ده انت كده حسيستوني انه واد لقطة, ناقص تقولي انه كمان بيعزف جيتار (ساعتها كان عاندي اهتمام زائد بالموسيقى و كان في محاولات تعلم البيانو كلاكيت تاني مرة) قالتي, تصدقي بقى, طنط فلانة قالت انه فعلا بيتعلم جيتار. انا استغربت الصراحة , الواد شكله من الحكابات كويس, يا ترى ليه بيدور على عروسة عن طريق اهله, لو كده , اكيد البنات بتتحدف عليه اصلا. قلت اسأل مامي, كلمت طنط فلانة و سألتها قالتلها , لشان الولد خجول و خايف يتضحك عليه فقال عن طريق اهله دي اضمن سكة. بصوا بصراحة انا قلبى مرتحش للاجابة دي , بس قلت افاكر في الموضوع باليل و اقول لمامي الصبح ماشي ولا لأ. قعدت مع نفسي فكرت , ما انا حبيت قبل كده و الموضوع ممشيشي, و بعدين هاخصر ايه يعني, اهيه مقبلة و السلام و بعدين كلمتين قعدوا يرنه في وداني "مثقف" و "جيتار" بس برده قعدت افكر في لغز لو هو جامد اوي كدة , ليه امه اللي بتدور على عروسة... قلت لمامي الصبح , ماشي يا حاجة ورينا الزبون

المقابلة كانت يوم في وسط الاسبوع بعد المغرب في النادي, و مكنتش مركزة اوي في موضوع هالبس ايه بس مامي كانت مركزة جدا. هاتروحي بالجينز , عيب, البسي هاجة شيك , ايه ده, ماروحتيش الكوافير ليه؟ الناس تقول ايه , هاتروحي مانكوشة كدة؟ ( ساعتها كان شعري قصير اوي و مموج) مش حاطة غير الكحل؟ خشي حطي روج كفاية شعرك الفضيحة. و قررنا نروح النادي ماشي ( ما هو النادي 10 دقائق من البيت اصل) و طول السكة محاضرة ان مينفعش اقابل عريس و انا مبهدلة كدة, انا مش رايحة النادي مع اصحابي... ده عريس يعني الواحدة المفروض يكون شاكلها أنيق و اني لازم ادي الانطباع اني بنت ناس و البس الدهب بتاعي و كده. انا غلطت و قلت يا مامي بس انا مش كده, انا لا بلبس دهب و لا بحط مكياج غير في المناسبات و لو واحد عايز يعرفني, لازم يشوفني زي ما انا بجد. قبل منتخانق كان بسلمته وصل مع والدته و طنط فلانة

الحق يتقال, اول لما شفتهم حسيت اني عايزة اعيط. انا يتعمل فيا كده؟ ليه ؟ حرام! الولد طويل و عريض اه, بس نسيوا يقولوا انه طخين و ضخم. وشكله كان (استغفر الله العظيم على التريقة) شبه العمدة في اغنية ابنك حميدة حدفني باستافندية. و طبعا كده بقت عندنا اجابة اللغز,, ليه عن طريق امه. بغض النظر عن اي حاجة اتقالت او ماتقالتش في القاعدة ديه لانني مش فاكرة منها حاجة خالص, كل ما ابصيله و افتكر ان ده عريس اتخيله لابس جلابية و مطلع بووزه لقدام بيقول هاتي بوسة . الموضوع اتقتل خالص يا حرام مكانش الولد عنده فرصة خالص, مش عرفة بقى لو كانوا قالوا قبلها انه شكله كده, هل فرصيته هاتكون احسن ولا اسوء بساللي حصل حصل . امي كانت مبهورة بيه, و قعدت تدافع عنه جدا لحد مقلتلها حاجتين

الاولى : ترضي احفادك يكون شكلهم كده؟

الثانية: اهون عليكي اصطبح كل يوم على الابتسامة ديه؟

مش هاخبي عاليكوا , لو على قد الاصتطباحة, مكانش عندها مانع, هو موضوع الاحفاد ده اللي جه على الجرح