قلبي بيتقطع كل يوم لما بفكر في الاسعار الهبل اللي بقت حولينا و بفكر الغلابة هيعملوا ايه. وانا كواحدة عندي هوس السيطرة( كنترول فريك) الموضوع بيتعبني اكثر كمان لأني عرفة اني مهما عملت مش هعرف اغير حاجة. اسوء حاجتين في الدنيا ان الواحد يشوف ضناه جعان او مريض و مش لاقي حاجة يعملها له لأنه ببساطة ممعاهوش ثمن الأكل او العلاج. بيتقطع قلبي خاصة في رمضان وانا بجيب صنية كنافة بالشوكولاتة ب٢٠٠ جنيه وانا عارفة ان ال ٢٠٠ جنيه دول هيأكلوا اسرة لمدة شهر.. بعمل اللي عليا في الزكاة وبحاول في الصدقات و باسعى في الخير، بس الموضوع اكبر مني ومن الكنافة.
بيتقطع قلبي اكثر كل يوم من اللي بيحصل في غزة، وفي كذا حتة تانية طبعا، بس جايز انا في دائرة معارفي اكثر تركيز هو مجزرة غزة اليومين دول. انا مش من الناس اللي وخدة قضية فلسطين على قلبها اوي عامة، بس مش ممكن القتل يكون بالطريقة دي لاطفال و ستات كبيرة و شباب زي الورد ويكون عادي كده. جايز انا فعلا قلبي رق عاى الاطفال بعد ما بقى في بوبو في حياتي، او جايز فعلا الميديا بتلعب على الحتة دي عشان تستفزنا نتحرك، في الحالتين، لما اشوف صورة طفل مات حاضن اخوه الصغير عشان يحميه من القذف محرقوين حاضنين بعض، المفروض احس بايه؟ كره للبني ادمين عموما.. عايزة كوكب تاني اعيش فيه لانني برضه مفيش حاجة بايدي
اللي بيقتلني بقى كل يوم اكثر واكثر ان مشاكلي الشخصية الهايفة هي اللي شاغلة بالي ومبتنيمنيش الليل ومبتخلينيش عارفة اركز في النهار. يعني احنا في رمضان، وحال البلد زفت، والناس مش لاقية تاكل ، والاطفال اللي زي الورد بيتقلتوا على بعد ٦ ساعات من هنا بالعربية، وفي مشاكل عائلية والشغل صعب وكل دهو واجئ انا في الاخر اللي ياخد تفكيري مين بعت رسالة قال فيها ايه وابعاد الموضوع ده ايه...ايه الهيافة والتفاهة وفراغ الدماغ ده. ايه قلة الحياء وانعدام الدم والاحساس ده. بس هعمل ايه، للاسف بحبه ومش عارفة اعمل ايه عشان انساه. وضميري بيأنبني اني قد ايه انانية كده، بس برضه مش عارفة اعمل ايه.
الحل الدعاء
ادعوا للغلابة اللي في البلد دي.. ربنا يرزقهم ويصبرهم
ادعوا للمرضى اللي مش لاقيين حق العلاج.. ربنا يشفيهم كلهم ويصبر اهلهم
ادعوا لاخوتنا اللي في غزة.، سواء بتحبوهم ولا لأ، والله غلابة واللي بيحصل فيهم لا يرضي عدو ولا حبيب... ربنا ينصرهم و يفك حصارهم
ادعوا لولادكم ..ربنا يبارك فيهم ويهديهم
ادعوا لاهلكم، ربنا يرحمهم دنيا واخرة
ادعوا لنفسكم بالهداية والرزق
وبعد ما تخلصوا كل ده، لو لسه ليكوا نفس وقادرين تدعوا، ادعوا لي ان ربنا يريح قلبي
امين.. على كل دعوة دعيتوها
Comments
يارب يريح قلبك ويسعدك
ويارب يحفظ أطفالنا وأولادنا ويغني فقراء المسلمين أجمعين
ويشفي كل مريض ويسعد كل حزين
أنا إسمي نسمه فاضل من متابعينك يا zeww :)