انا اسفة , مش عايزة اتنيل -16

غيبت غيبة طويلة المرة دي. انا اسفة , حقكم عليا, و رغم اني مكنتش هاتضايق من نفسي لو قلتلم خلاص زهقت من الموضوع ده و مش عايزة اكمل . كنت هابقى عادي يعني, عارفة انه عيب فيا و مش دائما باحول اصلحه , بس الصراحة , المرة دي مش الزهق هو المشكلة . في الحقيقة , ماكنش في مشكلة اصلا, كتن عندي بس بعض الاوهام في دماغي

. 

احكيلكم, فاكرين اول لما بدأ اكتب السلسلة دي, كنت تقريبا وصلت لحالة رضا بالحال, و ضبطت نفسي تماما اني فعلا مش عايزة اتنيل, مش متلقا يعني, اكيد طول عمري عايزة و هاعوز احب و اتحب, بس كنت قررت مش هاتعرف على حد قصد الجواز, بالبلدي, مش هاقابل عرسان, و صدقوني, مهما قلت النهارده او بعد كده , اعرفوا اني في حالة من الحيرة و الزهق و اللخبطة و متمسكوش عليا الكلام, لاني برده لسه مقتنعة ان المقابلة المترتبة دي (اللي هي عكس الصدفة اللي بتحصل لوحدها) مش طريقة طبيعية للتعارف و بيكون فيها تعقيدات كتير ملهاش اي معنى غير لو احنا سايبين الدنيا تمشي لوحدها.

اللي حصل اني بعد ما كتبت التدوينة ال 13(, اللي هو اصلا طلع او نزل رقم نحس اصلا!), تدخل القدر و اتحطيت في موقف من اياهم و اتعرفت على واحد ابن حلال. ليه قابلته مع ان انا زي ما كنت بقول كنت تقريبا حلفت ما اقبل عريس تاني؟ الموضوع زي ما بقولكم كده فيه تدخل الهي معرفش ازاي: اولا, حلمت به, ايوه, مكشوف عني الحجاب, حلمت اني هاقابل واحد دكتور رغم اني مابحبش الدكاترة, و هايكون اسمه مش من الاسامي الي بحببها. الحلم ده جاء في ليلة فيها حلمين تانيين برده اتحققه. (الثالثة ثابتة), و ثانيا, نفس الدكتور ده سمعت عنه ثالث مرات (برده الثالثة ثابتة) و اخيرا انه قالولي هو كمان مش عايز مواق على الطريقة دي في التعارف, قلت جايز(ثالة ثالثة ثابتة). اصدقائي قالولي والله يا بت يا ياسمين  شكل الموضوع  ده اكبر منا و منك, شوفيه من باب التجربة العلمية يعني مجرد علشان نعرف هو الي في الحلم ولا لأ.

سيبكم بقى من تفاصيل الاحداث, مش عايزة اتكلم عليها, المهم ان الموضوع بدأ و انتهى في اقل من شهر و لا كأن حد اداني قلم على خلقتي , و انا اصلا مش ناقصة. و واقفة انا دلوقتي في حالة صدمة و ذهول.

 طب يا رب ... كان ليه اصلا. ما انا كنت في حالي لا بيا ولا عليا كافية خيري شري ليه تفكرني معناها ايه اني احس اني مهمة و ليا معنى في حياة حد, اذا هاتاخد الاحساس ده مني في ثواني كده , و ليه يا   رب تشككني في نفسي, اقعد افكر انا قلت ايه غلط او عملت ايه غلط . و المهم ايه.. انني حتى مقدرش اقول اني حبيت او اتحبيت, مجرد ان في حد يملئ على الواحد حياته بتفكره ان قد ايه حياته مهما ملاها فاضية و عايزة شريك!و كل الحيطان اللي كنت بابنيها حولين مشاعري تتحطم بمجرد اني فتحت الباب لواحد يحاول يدخل قلبي. اللا يا ربي ده حتى مدخلش! ده انا طلعت عبيطة بشكل! حاقة تقرف
, !

يالله, الحمد لله على كل شئ, هانرجع تاني نبني الحيطان و نرم الابواب و نشغل نفسنا بحاجات اكتر, مهو اصله روتين معروف و محفوظ و مدروس. املئ الوقت بأي حاجة و كل حاجة لحد ما متلاقيش وقت تتنفس, , و اكتب المدونة, و اضحك و ضحك الناس معاك و عليك, هنا بس, ابطل اصعب على نفسي , و لما ابطل اصعب على نفسي, يبقى المشكلة اتحلت

بس طبعا احنا عارفين سخرية القدر, اول لما هابقى كويسة, هايحصل ايه ..........هايطلع من تحت الارض كمان عريس

ياللا فتتكم بعافية

سلام انا بقه  .