انا اسفة , مش عايزة اتنيل -15

فاكريني؟ ايوة , انا ياسمين, جيت تاني. باعتذر انني اتأخرت, بس انا قلتلكم قبل كده , عندي مشكلة انني دائما بابتدي حاجة و ماخلصهاش. و لكن تحت الحاح الجماهير (معليش هاعيش الدور شوية) قررت اني لازم اكمل, فالاول علشنكم, و لكن برده علشاني. انا اصلي لما بدات السلسلة دي, لقيت انني غصب عني براجع حاجات قديمة و بفهم علاقتها بقراراتي دلوقتي, فباستفاد انا كمان, و لا اجدع طبيب نفسي في الدنيا. ما علينا, باقول ندخل في الموضوع على طول

احنا كنا بنتكلم عن السنة العظيمة بتاعة اي بي ام و اللي حصل فيها. يتبقى في السنة دي 3 حكايات, هابتدي بقصة تظبيطة طنط . طنط دي كانت صديقة لجدتي الله يرحمها, و بالتالي صديقة لأمي و عمتي و العيلة و عيلة العيلة. و كانت بتسافر كل سنة اربع خمس مرات تشتري ملابس من المانيا و ترجع تعمل "اوبن داي" للمعارف و الاصحاب, فبالتالي كانت صديقة مش لعيلتي بس, لأ كل عائلات مصر الجديدة ساعتها. اللي حصل بقى انها عرفت انني اتخرجت من الجامعة و اشتغلت فحسيت ان واجبها الاجتماعي انها تتدخل و تشوف موضوع الجواز ده. و قالت تعمل حويطة و تعملها في الخباثة لما عرفت من امي انني مش عاجبني موضوع قابلي عريس ده. فعملت ايه بقه طنط , طلبت مني (علشان انا ساكنة جنبها) اوصل حاجة لواحد معايا في الشغل علشان هما ساكنين في المهندسين. طبعا انا علشان ذكية اوي كنت عارفة ان دي حجة واهية بس كان عندي حب استطلاع و فضول اشوف الشخص ده عامل ازاي

سبحان الله بقى , اول لما شوفته حسيت اكيد الاقدار تواطئت علشان تسعدني, معقولة يطلع الواد بتاع طنط ده هو الولد اللي ببصبص له انا و اصحابي! كنا حتى بنسميه " قميص لبني" علشانكان في قميص لبني حلو اوي عليه . الواد كان مؤدب اوي اوي اوي و متدين و باين عليه اوي انه ابن ناس, و لا احمد مظهر في الايدي الناعمة يعني ( طبعا و انا بفتكر الكلام ده سخسخت على روحي من الضحك ... قد ايه الانسان بيتغير مع الزمن.. كأنني بحكي عن واحد تانية خالص ليها ميول تانية خالص ) المهم, اتقابلنا و الكلام جاب بعضه و طلع  لنا اصدقاء مشتركين و اتقبلنا مع المجموعة كام مرة نشربقهوة في الشغل و بعدين خرجنا كلنا مرة مرتين و واحد من اصحابي بدأ يحس اني معجبة بالقميص اللبني و اخدني على جنب و قالي: يا ياسمين, هو صاحبي من زمان و انت برده صاحبتي, الولد شاكله بيحاول يرجع لخطيبته فمتتعلقيش. انا طبعا مصدقتوش , ده القدر اللي جمعنا على ايد طنط, اكيد يعني مش هتحط نفسها في الموقف ده, تعرفني على واحد لسه عنده مشاعر لخطيبته؟! بقى ده اسمه كلام؟! و فضلت عايشة في الوهم مع نفسي بتاع اسبوعين كمان لحد ما مرة و احنا خارجين , جاب واحدة قمر معاه و قال احب اعرفكم على خطيبتي! طشت ماياه سقعه اتقلب على دماغي و ابتسمت و سلمت و بوست و لكن من جواية كانت عندي صدمة.

تاني يوم بقى , صديقي قالي ان هو اتكلم معاه و باين امي اتكلمت مع طنط, مش فاكرة مين اللي قال ايه بس الحكاية طلعت انه هو كان فعلا متحمس يتعرف عليا لاني بالورقة و القلم هو ده اللي بيدور عليه , بس لما قابلني اكتشف انه لسه بيحب خطيبته الاولنية و نقول ايه بقى القلب و ما يريد. على الاقل ساعدت اتنين يلاقوا بعض من جديد. الموضوع ده علم معايا جامد قوي رغم ان الحكاية كلها كانت كام اسبوع , شهر- شهرين بالكتير, بس حسيت احساس وحش اوي حتى مش عارفة اوصفه ... مش عارفة ممكن يكون اسمه ايه, بس حسيت باشتغالة كبيرة اوي الدنيا عملتها علشان توقعني! ياللا بقه هنعمل ايه

و طبعا زي ما الكتاب قال بظبط علشان اهرب من الموضوع ده قربت قوي من صديقي النصوح في الشغل , الصراحة, انا معتقدش ان كان عندي مشاعر نحيته من نوع حب و جواز و كده. اكيد كنت معجبة بي كصديق . خاصة ان الوقت ده بتاع امتحانات المنحة و الانترفيوز و كدة و هو كان مجرب الموضوع ده و بيساعدني فيه. الضحك بقه اننا قربنا من بعض جدا لدرجة الناس كلها قالت في بيننا حاجة , حتى اصحابي و اصحابه  و اهلي و اهله , كلهم كانه مشجعين الموضوع. للاسف , انا صدقت. شوفتوا هبل اكتر من كده؟ صدقت ان عندي مشاعر تجاهه و ان هو كمان عنده مشاعر و مش صريح مع نفسه. عملت فيلم كبير في دماغي و عيشت فيه. الموضوع يكسف اصلا اني اعترف بالموضوع ده دلوقتي بس انا قلت الواحد يكون صريح مع نفسه على الاقل. المهم الموضوع ده قعد رايح جاي لحد السنة اللي بعدها لما رجعت من لندن في اجازة الكريسماس. اتكلمنا بصراحة و  كل واحد فينا قال الي جواه و قلنا هنتغاضى عن الموقف ده و نحاول نكون اصحاب تاني. الصراحة كانت صعبة شوية , قعدنا فترة مبنتكلمش خالص, و بعدين رجعنا نتكلم تدريجيا و بعدين الدنيا مشيت طبيعي بقه. مش هقول اصدقاء مقربين , بس على الاقل علاقات طيبة

القصة الاخيرة المرة الجاية ان شاء الله و معاها طقم دروس مستفادة عجب . ياللا فتكم بعافية