دعاء الأم

مش عارفة الموضوع ده بيحصل للناس كلها ولا لي انا بس , دائما كانت أمي تدعو لي دعوات على مزجها , ماهاش أي علاقة باللي انا فعلا عيزاه . يعني مثلا لأكون مزنوقة في قرشين و لأقولها يا ماما أدعيلي ربنا يفك ديقتي , تقوم تدعيلي مثلا بإبن الحلال أو أقولها أدعيلي ربنا يوفقني مثلا في اجتماع مهم في الشغل , هي تدعيلي مثلا ربنا يوقفلي في طريقي ولاد الحلال. كله حجات من النوع ده لحد ما أنا اصلا قلت خلاص هي مع نفساها بقى , تدعي على كيفها و أدعي على كيفي

كل ده عادي, الجديد بقى ان من كام شهر كده بقى في دعوة جديد , "ربنا يحبب فيكي خلقه" . الصراحة , الدعوة حلوة , و حبيتها. أصل حب الناس نعمة من ربنا , و بعدين حد يكره الناس تحبه؟ كل حاجة في الدنيا بتمشي اسهل لما الناس تحب الواحد . قلت ماش , الحمد لله برده , مافيش احسن من دعوة الأم. لكن من كام يوم, قبل مانزل من البيت , أمي قلتهالي تاني. و نزلت و عملت الى ورايا و جيت على اخر اليوم بركب العربية علشان اروح , ظهرلي منادي من تحت الأمر , قلت ماشي , أمرنا لله و طلعت الجنيه من المحفظة و بفتح الشباك علشان اديهوله و ظهرت المعجزة , الراجل رفض الجنيه !! ايوه , تصوروا , منادي يرفض الفلوس , عيشنا و شوفنا . المهم , بصيلي بإبتسامة و قلي " تسمحيلي لو سمحتي" و اقبل ما أنطق اصلا, الراجل كمل "أنت جميلة أوي "و ابتسم تاني و كمل "معلش , انا اسف , انا كان لازمة اقولها " طبعا انا اتثبت و معرفتش اقول حاجة , فمشيت. بس الموقف طبعا خلاني افكر في أمي و دعوتها. لما وصلت البيت ابتسمتلها و قلتلها "و النبي بس يا حاجة , لما تدعي ربنا يحبب فيا خلقه , ابقي حددي انه خلق بالضبط".