وحشتني

على الرغم من كل اللي بيحصل حوليا، اللي مهما حاولت انكره او اتغاضى عن وجوده بيغمرني بالاحساس باليأس وخيبة الأمل، مش قادرة أبطل أفكر فيك، بس متقلقش.. أنا كويسة وزي الفل.

مش متأكدة إذا كان ده حالة ال 

passive-aggressive

 اللي عندي دي سببها عدم مبلالة حقيقي للواقع الغريب اللي بعيشه اليومين دول ولا ده علامة ان الواحد جتته تلّمت من كثر ال

rejection

 ولا ببساطة هي كانت مسألة وقت، والوقت عدى خلاص.

 الخلاصة اني  فكرت مع نفسي مرارا وتكرارا وحقيقي مش قادرة ألومك على أي حاجة. اصل ابقى في حالة 

denial

 عجيبة لو لسة مش واخدة بالي ان العيب في انا، ما هو مش ممكن يكون كل الناس غلط وانا اللي صح لما المشكلة تتكرر كذا مرة. اعذرني.. انا اللي مقرأتش ال

Terms and Conditions

 بوضوح قبل ما اقول اني موافقة. أنا أسفة أني حطيتك في موقف سخيف لدرجة أنك خليت بالوعد الوحيد اللي وعدتني به علشان تفهمني ان القصة انتهت.

بس والله بجد، انا عذراك ومش زعلانة منك خالص، بالعكس، اديني اهو بعتذرك لو لسه بتقرا البلوج بتاعتي اصلا. انت بس واحشني ، وحشتني أوي بصراحة.

 بس متخافش، أنا بحترم رغبتك وقرارك في الانسحاب من حياتي. بس لو انت فعلا بتقرا البلوج دي، متلومنيش اني بكلمك،  انت مكنتش هتشوفها لو انا كمان مش وحشاك