للمرة الألف (رقم مجازي) جاءت أمي وقالت لي: عايزة أقولك حاجة مش هتعجبك. وبمنتهى الثقة قبل ما تكمل كلامها: أنا لسة وزنة نفسي دلوقتي ولقيت نفسي خسيت.. فمتقوليليش تخنتي تاني.
ماهو في ٣ مواضيع بيني وبين مامي هما اللي دائما بنتخانق عليهم: أول واحد أني مش إجتماعية وودودة مع العائلة، وده غالبا بيطرح حولين المناسبات الإجتماعية والزيارات وفي الوقت الحالي مفيش حاجة من دول على الأفق، بالعكس، أنا في رمضان عملت الواجب المفروض .
الموضوع الثاني: خناقات الوزن- إعملي رجييم، لأ مش هاعمل. تخنتي... لأ أنا حلوة كدة..وده عادة لا ينتهي لأني معنديش ثقة كافية إنني أقاوح كثير وفي نفس الوقت معنديش إستعداد أعمل رجييم تاني.
ويجي الموضوع الثالث.. الخناقات التي لا تنتهي مهما طالت فترة غيابها... عرسان!
يا الله.. مهما كنا على وفاق أنا ومامي، لازم تنكد عليا بالموضوع ده. سبحان الله، طب طول ما إنت عارفة يا ست الكل إن الموضوع ده هيزعلني، ايه لزمته اصلا؟! متفهمش، هي بتيجي كده، كل كام شهر تخبطني خبر من دول.
الغباء بقى.. اني كل مرة بتصدم وبتنح وبيجيلي حالة من البلاهة.. بيكون نفسي تنسى أو إنها تكون إقتنعت أخيرا إن مش دي الطريقة اللي أنا شايفة نفسي بتجوز بيها أو يئست من موضوع الجواز أو أدركت إن هي بتحبني مثلا ومش عايزة تفرط فيا. أنا كنت يتهيألي أن .خلاص بقى في بوبو(ابن اخويا) فمحدش فاضيلي... بس طلعت غلطانة زي ما أنا غلطانة في كل حاجة في حياتي.. ياللا حصل الخير
المهم.. إحنا في موود النكد والوضع حرج ومحتجين دعاوتكم معانا
متشكرين أوي
Comments
اسف لو ده تدخل بس حابب افهم
تجي نتبدل الامهات بما انه ماما مش راضيه تخليني اعرس
تحياتي
وصباح الفل علي عيونك
بص يا سيدي.. أنا عندي إعتراض على فكرة أن واحد يتعرف على واحدة علشان الجواز. يعني في تصري، الطريقة الأنسب أن واحد وواحدة يتقابلوا في ظروف طبيعية غير مصطنعة ولو في قبول بعد عشرة ومعرفة، يبدأوا يتكلموا مع بعض في فكرة الإرتباط والجواز. إنما جواز كدة مرة واحدة ، في رأيي ده مش منطقي ومش طبيعي.
وفي حالة أني قابلت واحد وشايفة إن فيه كيمياء بيننا وإعجاب ، معنديش أي مشكلة أن أنا شخصيا أتكلم معاه في الموضوع
@Saba7al5air
صباح الفل عليكي.. شكل كدة محدش عجبه حاله! ياللا الحمد لله على كل شئ