انا اسفة , مش عايزة اتنيل -12

انا جيت تاني ...قعدت افاكر يا ترى احكي عن الدروس المستفادة من سنين الجامعة و لا اسيبها لكل واحد يستنتجها على كيفه؟ فالأخر قلت هقول حجات بسيطة و اسيب الحذق يفهم

اول حاجة اكتشفتها, زي ما بنات كتير بتكتشف عن نفسها في سنين الجامعة , انني , و اللحمد لله رب العالمين يعني, على قدر لا بأس به من الجمال. مغرورة؟ جائز بس ايه... رحم الله امرئ عرف قدر نفسه

تاني حاجة , اكتشفت , برضه ,زي ما بنات كتير بتكتشف, انني حظي قليل في موضوع الحب ده. لي اصحاب كتير خلصوا جامعة متجوزين , او مخطوبين او على الاقل قابلوا اللي في المستقبل هيكون شريك حياتهم. و انا قابلت تجارب رفض قد ما قابلت معجبين

ثالث حاجة و دي مهمة جدا, اكتشفت هوس الشعب المصري بالتضبيط عامة و الجواز خاصة مما يؤدي الي مواقف محرجة كتير

رابعا  و دي برضه مهمة جد, ان غالبا الاهالي المتحمسين دول بيكونوا عندهم حلم كامل في دماغهم للفرح و الشقة و العفش و كل حاجة, مش ناقص بس غير الباش مهندس اللي هيلعب دور العريس او الانسة الموقررة اللي هاتلبس الفستان الابيض. الاهالي دول منهم للأسف الشديد أهلي انا شخصيا

خامسا و غالبا دي اهم حاجة , اني بدأت اكون رأيي في موضوع  التضبيط و العرسان و جواز الصالونات. في المرحلة دي مكونتش لسه وصلت لنظرياتي العظيمة عن الموضوع ده ( و دي اكيد هاحكيلكوا عليها بعدين) بس على الاقل اتتضح ان الموضوع ده مش ليا