حبوب الشجاعة

"snooze" كل يوم يبدأ المنبه يرن الساعة سابعة و نصف. ثم تبدأ قصة الصبح المعهودة .ابص للسقف شوية و بعدين أدووس مرة و اثنين و ثلاثة. احيانا اقعد على الحال ده ساعة او اكثر. كل مرة بيكون في حجة جديدة ؛ مرة اقول الجو بارد , خليني تحت الغطاء شوية , و مرة أقول أنا معنديش اجتماعات مهمة , ممكن اروح الشغل متأخر , و كتير فى الحقيقة أقوم من السرير , افتح الدولاب و ارجع ثانى السرير افكر ممكن البس ايه انهار ده

المهم انني اضيع ما لا يقل عن ساعة و بعدها استجمع قواتي كلها و اقوم من السرير , و بعدين اخد الدش التمام و البس و اضرب "حبوب الشجاعة" و بعدين ابص لنفسي في المرايا و اقول "اجمد يا وحش !"و اتكل على الله و انزل

المهم , يمر الوقت و انا عملة فيها وحش و سبعة في بعض ولا بتهز ولا حاجة في الدنيا تهمنى .

انا شجيع السيما

ابو شنب بريمة ,

اصرج و اقول عالي هوب و اصرخلي صرخة

السبع يتكهرب و يبقي فرخة

و يعدي الصبح و الظهر و اجي على العصرية كدة و يكون لازم جرعة تانية من حبوب الشجاعة و إلا انا التي هاتكهرب و ابقى فرخة

اخد الجرعة التانية و ابص لنفسي في المراية و اقول "هانت يا جميل , فات الكتير وما باقي الا القليل

المهم , النص الثانى من اليوم بيعدي ببطئ شديد

و تحصل فيه مشاكل كتير و أكون تقريبا فقدت القدرة على المناهدة و الخناق

و كأن كل الاقدار بتتواطئ ضدي

كأن في حد بيراقبني و حالف مئة يمين لازم ينكد عليا

بأقول عادي , هانت

تيجي المرحلة بتاة المرواح , اركب العربية و اتزنق في الزحمة و طول ما أنا قاعدة أسب و ألعن في اليوم و في العيشة و اللي عايشنها

و ألاقى نفسي مش قادرة اكمل , مخي عمال يودي و يجيب في كل المشاكل الي بتواجهني ,خلاص هاعيط و حقيقي كش قادرة

, اضرب كمان جرعة من حبوب الشجاعة و ابص لخيالي على قزاز العربية, و اقول لنفسى , يا زيو يا جميلة , معقولة كده نروح لماما دمعتنا على خدننا. نستحمل شويا , كلها كام ساعة و نقابل الحبيب الغالي

اوصل البيت , و عادة مش بلاقي حد و اكيد دي الفرصة الذهبية علشان الواحد ينكد على نفسه . فيه طريقين, أما استسلم لضغط القدر و نقلبها نكد و احساس بالوحدة و الفشل و عياط و كده , أو الواحد يأخذ كمان جرعة حبوب شجاعة و يعمل حاجة مفيدة , حتى لو كانت مجرد مشاهدة فيلم او مكلمة تليفون

بغض النظر اخترت انه من الطريقين دول, برده الطاقة بتخلص , و الاحساس بالفراغ بيزيد , الواحد بيشتاق لحبيبه

ابصيله من بعيد بدلال , يرد عليا بحنية

افتكر حضنه , يوحشني اكثر

اقول خلاص , قطيعة , و انا بعذب نفسي ليه

ارمي نفسي في حضنه و اتغطي كويس ..انا بحبه و هو بيحبني, الناس عايزة ايه , و بعدين محدش بيموت من كتر النوم يعني

و اقعد يجي ساعة في حضنه بفكر في يومي , يوم ممل زي كل يوم , و اتأمل, يا نهار اسود لو كانت بقيت الايام تبقى كده

و قبل ما ابدأ في المخاوف و الهلاوس , اقوم بسرعة اضرب اخرة جرعة من حبوب السجاعة , و ابص في المرايا و اقول

هانخاف من النوم كمان يا ياسمين , نامي بس و اتكلي على الله , بكرة ان شاء الله يبقى احسن